काठमाडौं। प्रमुख प्रतिपक्ष दल नेकपा (एमाले)ले प्रधानमन्त्री पुष्पकमल दाहाल ’प्रचण्ड’ संसद्मा माफी माग्न तयार भए संसद् चल्न दिने भएको छ। आज संसद् भवन परिसरमा सञ्चारकर्मीले राखेका जिज्ञासाको जवाफ दिने क्रममा एमालेका प्रमुख सचेतक पदम गिरीले प्रधानमन्त्रीले आफूले दिएको अभिव्यक्तिप्रति संसद्मा उभिएर माफी मागे संसद् चलाउन सकिने बताएका हुन् ।
तर, अहिलेको अवस्थामा प्रमुख तीन दलको बैठकले पनि निकास नदिएकाले प्रधानमन्त्रीले राजीनामा दिनुपर्ने एमालेको अडान यथावत् रहेको उनको भनाइ छ। “प्रधानमन्त्रीले राजीनामा दिनुपर्छ भन्ने हाम्रो माग यथावत् नै रहन्छ। र, उहाँले जो कुरा बोल्नुभएको छ। त्यसका उहाँले कम्तीमा पनि सदनमा आएर माफी माग्नुभयो भने छलफल गर्ने एउटा वातावरण बन्न सक्छ,“ गिरीले भने ।
उनले प्रधानमन्त्रीले मुलुकको स्वाभिमान, स्वाधीनता र सार्वभौमिकतालाई माटोमा मिलाउने गरी दिएको अभिव्यक्ति कुनै पनि हालत क्षम्य नहुने बताए।
“आज संसारका लोकतान्त्रिक मुलुकहरू, विकसित मुलुकहरूको प्रमुखले कार्यकारी राष्ट्रपतिले वा कार्यकारी प्रधानमन्त्रीले यस्तो प्रकारको अभिव्यक्ति दिनुहुन्थ्यो भने तत्क्षण सत्ताबाट च्यूत हुन्थ्यो। तत्काल देशका नागरिकहरू स्वाभिमानका झन्डा बोकेर सडकमा आउँथे। संसद्भित्र आगो बल्थ्यो,“ उनले भने ।
