काठमाडौं। नेपाली कांग्रेसका जिल्ला सभापतिहरूको भेला आज बस्दैछ।सानेपास्थित पार्टी केन्द्रीय कार्यालयमा दिउँसो १२ बजे बैठक बस्न लागेको हो। पार्टी महामन्त्रीद्वय गगन थापा र विश्वप्रकाश शर्माले जिल्ला सभापतिहरूलाई छलफलका लागि काठमाडौं बोलाएका हुन्।
आज र भोलि सञ्चालन हुने बैठकमा मुख्य छलफल पार्टी सदस्यता वितरण,नवीकरण र पार्टी सञ्चालन विधिबारे हुने छ।जिल्ला सभापतिहरूले क्रियाशील सदस्यको जिल्लागत अवस्था जानकारी गराएपछि त्यसमाथि छलफल हुने तय भएको छ।
बैठकमा बोलाउनुअघि जिल्ला सभापतिहरूलाई क्रियाशील सदस्यता र कांग्रेस सदस्यताको विवरण,नवीकरण र अभिलेखीकरणको बिषय,विधान बमोजिम गर्नुपर्ने पार्टीका विभिन्न तहका सम्मेलनका विषय र पार्टी संचालन तथा व्यवस्थापनलगायतका विषयसहित उपस्थित हुन पत्राचार गरिएको छ।
जिल्ला सभापति उपस्थित हुन नसके उपसभापति उपस्थित हुने,भौतिक रूपमा सहभागिता जनाउन नसके अनलाइनमार्फत अन्तर्क्रिरयामा सहभागी हुनसक्ने व्यवस्था पनि गरिएको छ।
