सरकारले यो वर्षका लागि उखुको न्यूनतम खरिद मूल्य सरकारी अनुदान बाहेक प्रतिक्विन्टल ५ सय २० रुपैयाँ निर्धारण गरेको छ ।
मन्त्रिपरिषद्को निर्णय सार्वजनिक गर्न बिहीबार सिंहदरबारमा आयोजित पत्रकार सम्मेलनमा सरकारका प्रवक्ता ज्ञानेन्द्र बहादुर कार्कीले उखुको उत्पादन लागत र किसानको नाफावापत् प्रति क्विन्टल ५२० रुपैयाँ पाउने जानकारी दिए । त्यस्तै सरकारले दिने अनुदान ६५ रुपैयाँ २८ पैसा र उखु किसान प्रवर्द्धन शीर्षकमा प्रति क्विन्टल ४ रुपैयाँ ७७ पैसा थप गरेर यस वर्ष किसानले ५ सय ९० रुपैयाँ पाउनेछन् ।
बैठकले कृषि तथा पशुपन्छी विकास मन्त्रालयले भारतबाट जीटुजीमार्फत मल खरिद गर्न सम्झौता गर्ने निर्णय गरेको छ । त्यस्तै बैठकले राष्ट्रिय अनुसन्धान विभागको प्रमुखमा यदुलाल खरेल र राष्ट्रिय युवा परिषद्को उपाध्यक्षमा सुरेन्द्र बस्नेतलाई नियुक्त गरेको छ । बैठकले गृहमन्त्रालयको लागूऔषध नियन्त्रण शाखा प्रमुखसहित ७७ वटै जिल्लाका सीडीओलाई लागूऔषध नियन्त्रण अधिकारी तोक्ने निर्णय गरेको छ । त्यस्तै मन्त्रिपरिषदले जापान सरकारबाट प्राप्त हुने १० अर्ब ३९ करोड नीतिगत ऋण स्वीकार गर्ने, प्रहरी नियमावली संशोधन गर्ने, राजपत्र हरेक हप्ताको सोमबार र बिहीबार दुई दिन प्रकाशन गर्ने निर्णय गरेको प्रवक्ता कार्कीले जानकारी दिए ।
बैठकले एसिड आक्रमण पीडित मुस्कान खातुनलाई तीन लाख आर्थिक सहायता उपलब्ध गराउने निर्णय गरेको छ । बैठकले गोरखापत्र संस्थानलाई गोदाम भवन निर्माण गर्नका लागि जग्गा प्राप्त गर्न स्वीकृति दिने निर्णय गरेको छ भने राजपत्राङ्कित प्रथम श्रेणीका सहसचिव कृष्ण बहादुर राउतलाई विशिष्ट श्रेष्णीको सचिव पदमा बढुवा गर्ने निर्णय गरेको छ ।
