एनआरएनएलाई राष्ट्रपतिको आह्वान,‘नेपालमा लगानीको अपार सम्भावना छ, सदुपयोग गर्नुस’

काठमाडौँ। राष्ट्रपति रामचन्द्र पौडेलले नेपालमा लगानीको अपार सम्भावना रहेको भन्दै त्यसको सदुपयोग गर्न गैरआवासीय नेपाली सङ्घ(एनआरएनए)लाई आग्रह गरेका छन्। आजबाट काठमाडौंमा सुरु भएको एनआरएनएको ११ औँ विश्व सम्मेलनलाई सम्बोधन गर्दै राष्ट्रपति पौडेलले नेपालमा लगानी गर्न आह्वान गरेका हुन्।

‘नेपालीमा लगानीको अपार सम्भावनाको सदुपयोग नगर्नुहोस् र, तपाईँहरु बसोबास गरेको मुलुकका लगानीकर्तालाई पनि नेपालमा लगानी गर्न अभिप्रेरित गर्नुहोस्’, राष्ट्रपतिले भने ।

देशको आन्तरिक क्षेत्रमा लगानी वृद्धि गरी आर्थिक विकास गर्न सके मात्र विकास र समृद्धि हुन सक्ने भन्दै राष्ट्रपतिले यसतर्फ एनआरएनएको ध्यानाकर्षण गराए । यसो भएमा नेपाल र विदेशमा बस्ने सबै नेपालीको पनि शीर उँचो हुने राष्ट्रपतिको भनाइ छ ।

उनले भने,‘नेपाल समृद्ध नहुँदासम्म नेपालीको प्रतिष्ठा बढ्न सक्दैन,नेपाललाई विकास, समृद्धि र सुशासनतर्फ लैजान तपाईँहरु (एनआरएनए)को रणनीतिक भूमिका र दायित्व वाञ्छनीय छ ।’

राष्ट्रपतिले एनआरएनएको सरोकारको विषयमा नेपाल सरकारले नीतिगत तथा कानुनी व्यवस्था तर्जुमा गरेको भन्दै एनआरएनए नागरिकताको पनि व्यवस्था गरेको बताए ।

विभिन्न मूलकमा रहेका नेपालीलाई एकताबद्ध एनआरएनएले भूमिका खेलेको भन्दै प्रशंसा गर्दै राष्ट्रपतिले राजनीतिक परिवर्तन भए पनि संक्रमणकाल लामो बन्दा केही चुनौती पनि देशमा देखिएका भन्दै यसप्रति सबै पक्ष सचेत बन्नुपर्नेमा जोड दिए ।