राजधानीमा जारी सहिद स्मारक ए डिभिजन लिग फुटबलमा हिमालयन शेर्पा क्लब र नेपाल पुलिस क्लबबीच बराबरीमा खेल टुंगिएको छ ।
त्रिपुरेश्वरस्थित दशरथ रंगशालामा बुधबार हिमालयन शेर्पा र नेपाल पुलिसले १–१ गोलको बराबरी खेलेका हुन् । प्रतिस्पर्धात्मक बनेको खेलमा हिमालयन शेर्पाले बनाएको एक गोलको अग्रता उल्टाएर पुलिसले बराबरी खेलेको हो । खेलको ५३ सेकेण्डमा कप्तान विश्वास श्रेष्ठले गोल गर्दै हिमालयन शेर्पालाई सुरुआती अग्रता दिलाएका थिए । त्यस्तै, दोस्रो हाफमा आक्रामक देखिएको पुलिसबाट सुमन लामाले ६० औं मिनेटमा गोल गर्दै पुलिसलाई १–१ गोलको बराबरीमा फर्काए ।
यस बराबरीसँगै पुलिसले ३ खेलमा ५ अंक जोडेको छ भने हिमालयन शेर्पाले ३ खेलमा २ अंक जोडेको छ ।
