नेपाल राष्ट्रिय तथा अन्तर्राष्ट्रिय खेलाडी संघले खेलाडीको सामाजिक सुरक्षा, अन्तर्राष्ट्रिय प्रतियोगितामा पदक विजेता खेलाडीलाई नियमित पुरस्कारको व्यवस्था लगाायतका माग राख्दै राष्ट्रिय खेलकुद परिषद् सदस्य सचिव टंकलाल घिसिङलाई ध्यानाकर्षण पत्र बुझाएको छ ।
मंगलबार संघले सदस्यसचिव घिसिङलाई सफल कार्यकालको शुभकामना दिँदै आफ्नो ६ बुँदे ध्यानाकर्षण पत्र बुझाएको हो । संघले खेलाडीको प्रोत्साहन भत्तामा अहिले स्वर्ण पदक विजेतालाई मात्र दिँदै आएकोमा रजत र काश्य पदक विजेतालाई पनि व्यवस्था गर्न माग राखेको छ । त्यस्तै सागमा स्वर्ण र रजत जित्ने खेलाडीलाई खेलकुदमा नै राज्यले रोजगारीको व्यवस्था गर्ने गरेकोमा पछिल्लो पटक त्यो व्यवस्था हटेकाले त्यसलाई फेरि निरन्तरता गरिदिन माग गरिएको संघका अध्यक्ष दीपक श्रेष्ठले जानकारी दिए । खेलाडीको कल्याणकारी कोषमा अर्थ मन्त्रालयले गरेको बाचा अधुरो रहेको र यसलाई थप मजबुत बनाउन हरेक वर्ष २० लाख रुपैयाँ कोषमा थप गर्नका लागि पहल गर्न उनले अनुरोध गरे ।
राखेप सदस्य सचिव घिसिङले संघले राखेका विषयलाई आफूले सम्बोधन गर्ने बताए । कोषमा २० लाख थप्ने विषयलाई निरन्तरता दिन पहल गर्ने र यसलाई कार्यविधि बनाएर खर्च गर्नुपर्ने उनको भनाई छ । उनले जीवनको महत्वपूर्ण समय राष्ट्रमा खर्चिएका खेलाडीहरुको उचित व्यवस्थापनका लागि कार्ययोजना बनाइने बताए ।
संघले खेलकुद मन्त्रालय र राखेपमा नयाँ नेतृत्व आएपछि ध्यानाकर्षण बुझाउने गरेको छ । ध्यानाकर्षण बुझाएपनि आफ्ना मागका बारेमा सरोकारवाला निकाय गम्भीर नभएको संघको गुनासो छ ।
