काठमाडौंं(एजेन्सी)–इन्डियन प्रिमियर लिगमा सनराइजर्स हैदरावादले पहिलो जित निकालेको छ । बुधबार भएको खेलमा पञ्जाव किंग्सलाई नौं विकेटले हरायो । जारी प्रतियोगितामा पञ्जावको यो तेस्रो हार हो । टस जितेर पहिले ब्याटिङ गरेको पञ्जाव १९ ओभर चार बलमा एक सय २० रनमा अलआउट भयो । राम्रो सुरुवात गर्न नसकेको पञ्जावले १५ रनमा पहिलो विकेट गुमायो । त्यसपछि उसले ४७ रन बनाउदा चार विकेट खेर फालेको थियो ।
उसका कुनैपनि खेलाडीविच दरिलो साझेदारी हुन सकेन । जसका कारण उसले अन्तिममा एक सय २० रनमा समेटिन पर्यो । उसका ओपनर लोकेश राहुल चार रनमा आउट भए भने मायांक अग्रवालले २२ रन बनाए । यस्तै क्रिस गेलपनि १५ रनमा पेभेलियन फर्किदा निकोलस पुरनले खाता खोल्न सकेनन् । यस्तै दिपक हुडाले पनि १३ रन बनाए भने मोइसेस हेनरिक्सले १४ तथा शाहरुख खानले २२ रन थपे । तर अरु खेलाडी एकोहोरो रनमा आउट भए ।
