काठमाडौं महानगरपालिकाको मेयर पदका स्वतन्त्र उम्मेदवार बालेन शाहले आफ्ना प्रतिस्पर्धीसँग मतान्तर फराकिलो बनाउँदै लगेका छन्।
मतगणनाको सुरूदेखि नै अग्रता लिएका उनले अहिले १० हजार बढी मतान्तर बनाइसकेका छन्।
५४ हजार ४ सय ६६ मत गणना हुँदा शाहले २१ हजार २२९ मत पाए। उनका प्रतिष्पर्धी नेकपा एमालेका उम्मेदवार केशव स्थापितले १० हजार ८६२ मत र नेपाली कांग्रेसकी उम्मेदवार सिर्जना सिंहले १० हजार ५५ मत पाएकी छन्। स्थापितसँगको शाहको मतान्तर १० हजार ३ सय ६७ छ ।
वडा नम्बर १, २, ३ र ५ को मत गणना भइसकेको छ। वडा नम्बर १ मा शाहले ७८३ मत पाउँदा स्थापितले ३६५ र सिंहले ४५१ मत पाएका थिए। वडा नम्बर २ मा शाहले १२१५, स्थापितले ७२८ र सिंहले ४९७ मत पाएका थिए। यस्तै वडा नम्बर ३ मा शाहले २४०६ मत पाउँदा स्थापितले १२०३ र सिंहले ११७० मत पाएका थिए। त्यस्तै, वडा नम्बर ५ मा भने शाहले १५०१ मत पाउँदा स्थापितले १०६६ मत र सिंहले ७२७ मत पाएका थिए।
अहिले वडा नम्बर ४, ६, ७, २८, २९, ३०, ३१ र ३२ को मतगणना भइरहेको छ। अहिले भएका सबै वडामा शाहले अग्रता कायमै राखेका छन्।
