नेकपा एकीकृत समाजवादी पार्टीका अध्यक्ष माधवकुमार नेपालले चुनावपछि नेकपा एमालेको हाल बेहाल हुने दाबी गरेका छन् ।
बुधबार जनकपुरधाममा पार्टी प्रवेश तथा प्रदेश कार्यालयको उद्घाटन कार्यक्रमअघि सञ्चारकर्मीसँग कुराकानी गर्दै अध्यक्ष नेपालले जनताले एमालेलाई विश्वास नगर्ने भन्दै अबको चुनावपछि एमालेको अवस्था बेहाल हुने दाबी गरेका हुन् । उनले अहिले केपी ओलीले सूर्यको धाक देखाएर केही गर्न नसक्ने बताए । नेपालले देशमा रहेका सबै समूदायलाई समान अधिकार दिन प्रतिबद्ध रहेको जिकिर गरे ।
त्यस्तै पार्टी प्रवेश कार्यक्रममा नेपालले, नागरिकता विधेयकमा देखिएको समस्या जति सक्दो चाँडो समाधान हुने र सम्पूर्ण नेपालीले नागरिकताको हक पाउने बताए । त्यस्तै, उनले जनकपुर जयनगर रेल सुचारु गर्न सक्दो पहल भइरहेको उल्लेख गरे ।
अध्यक्ष नेपालले प्रदेश २ को स्थायी राजधानी जनकपुरधामलाई बनाउनु नै न्यायोचित हुने भन्दै सहमतिमा प्रदेशको नाम टुङ्गो लगाउनुपर्ने उल्लेख गरे । कार्यक्रममा विभिन्न दलबाट आएका कार्यकर्तालाई एकीकृत समाजवादी प्रवेश गराइएको थियो ।
